A-116
25 iyul 2001-ci il

Maliyyə Nazirliyinin və Vergilər Nazirliyinin «Xarici ölkələrin diplomatik və analoji nümayəndəliklərinin rəsmi istifadəsi, həmçinin, bu nümayəndəliklərin diplomatik, inzibati və texniki işçilərinin, o cümlədən onlarla yaşayan ailə üzvlərinin şəxsi istifadəsi üçün nəzərdə tutulan mal və xidmətlərə görə əlavə dəyər vergisinin sıfır (0) dərəcə ilə tutulmasına dair» birgə Prosedur qaydalarının icrasının təmin edilməsi məqsədilə

Ə M R    E D İ R Ə M

1. «Xarici ölkələrin diplomatik və analoji nümayəndəliklərinin rəsmi istifadəsi, həmçinin, bu nümayəndəliklərin diplomatik, inzibati və texniki işçilərinin, o cümlədən onlarla yaşayan ailə üzvlərinin şəxsi istifadəsi üçün nəzərdə tutulan mal və xidmətlərə görə əlavə dəyər vergisinin sıfır (0) dərəcə ilə tutulmasına dair» Prosedur qaydaları tətbiq edilsin (əlavə olunur).

2. Ərazilərində xarici ölkələrin diplomatik və analoji nümayəndəlikləri yerləşən şəhər (rayon) vergilər idarələrinin (şöbələrinin) rəislərinə tapşırılsın:
 - xarici ölkələrin diplomatik və analoji nümayəndəliklərin uçota alınması (VÖEN verilməklə) və onların şəxsi hesab vərəqələrinin açılması təmin edilsin;
 - Qaydaların icrası rəsmi qaydada bəyannamələrin yoxlanılması və uçotun təşkili şöbələrinin konkret vəzifəli şəxslərinə həvalə edilsin;
 - Qaydaların surəti ərazidə yerləşən xarici ölkələrin diplomatik və analoji nümayəndəliklərinə çatdırılsın.

3. Əmrin surətinin Vergilər Nazirliyinin struktur bölmələrinə çatdırılması Nazirliyin Katibliyinə (E.Hacıyev) tapşırılsın.

4. Əmrin icrasına nəzarət Vergilər Nazirinin müşaviri S.Məmmədovaya tapşırılsın.

Nazir                                                                                F.Məmmədov

Xarici ölkələrin diplomatik və analoji nümayəndəliklərin rəsmi istifadəsi, həmçinin, bu nümayəndəliklərin diplomatik, inzibati və texniki işçilərinin, o cümlədən onlarla yaşayan ailə üzvlərinin şəxsi istifadəsi üçün
nəzərdə tutulan mal və xidmətlərə görə əlavə dəyər vergisinin sıfır (0) dərəcə ilə tutulmasına dair

P R O S E D U R      Q A Y D A L A R I

  
Bu Qaydalar xarici ölkələrin diplomatik və analoji nümayəndəliklərin rəsmi istifadəsi, həmçinin, bu nümayəndəliklərin diplomatik, inzibati və texniki işçilərinin, o cümlədən onlarla yaşayan ailə üzvlərinin şəxsi istifadəsi üçün nəzərdə tutulan mal və xidmətlərə görə əlavə dəyər vergisinin sıfır (0) dərəcə ilə tutulması qaydalarını müəyyən edir.
Qaydalar Vergi Məcəlləsinin 85-ci, 87-ci, və 165-ci maddələrinə və Nazirlər Kabinetinin 23 fevral 2001-ci il tarixli 48 saylı Qərarı ilə təsdiq edilmiş «Artıq ödənilmiş vergilərin, faizlərin və maliyyə sanksiyalarının vergi ödəyicisinə qaytarılması» Qaydalarına əsasən tətbiq edilir və 01 yanvar 2001-ci il tarixdən sonra yaranan hüquqi münasibətlərə şamil edilir.
 
I. Ümumi anlayışlar

Nümayəndəlik – xarici ölkələrin diplomatik nümayəndəlikləri və onlara bərabər tutulan analoji qurumlar;
İşçilər və ailə üzvləri – xarici ölkələrin diplomatik nümayəndəliklərinin «Diplomatik münasibətlər haqqında» Vyana konvensiyasının 1-ci maddəsi ilə müəyyən edilmiş diplomatik agentləri və inzibati-texniki heyətin üzvləri, o cümlədən onlarla yaşayan ailə üzvləri;
- diplomatik nümayəndəliyə bərabər tutulan analoji qurumların müvafiq statuslu heyətinin üzvləri, o cümlədən onlarla yaşayan ailə üzvləri.
Diplomatik agent – nümayəndəliyin başçısı və ya diplomatik ranqı olan heyətin üzvləri;
İnzibati-texniki heyətin üzvləri – nümayəndəliyin inzibati-texniki xidməti həyata keçirən heyətinin üzvləri;
Vergi orqanı – müvafiq şəhər (rayon) vergilər idarələri (şöbələri);
Maliyyə orqanı – müvafiq şəhər (rayon) maliyyə idarələri (şöbələri).

II. Vergitutma

1. Nümayəndəliklərin rəsmi istifadəsi üçün nəzərdə tutulan malların və xidmətlərin satışı nümayəndəliklərlə bağlanan müqavilələr və digər analoji razılaşma sənədləri əsasında həyata keçirildikdə, ödəniş formasından (nəqd və ya nəqdsiz qaydada) asılı olmayaraq, bu əməliyyatlardan əlavə dəyər vergisi sıfır (0) dərəcə ilə tutulmalıdır.
Bu halda malların və xidmətlərin alıcısına əlavə dəyər vergisi sıfır (0) dərəcə ilə göstərilməklə vergi hesab-fakturaları təqdim edilməlidir.
2. Digər hallarda mallara və xidmətlərə görə əlavə dəyər vergisinin sıfır (0) dərəcə ilə tutulması malların və xidmətlərin dəyərinə daxil olan və ödənilən əlavə dəyər vergisinin qaytarılması yolu ilə həyata keçirilir.
 Bu halda mallar və xidmətlər əlavə dəyər vergisi ilə birgə təqdim edilməli və sonradan, ödənilmiş həmin vergi məbləği büdcədən geri qaytarılmalıdır.
3. Əlavə dəyər vergisinin qaytarılması üçün əsas bu malları və xidmətləri təqdim edən şəxslər tərəfindən təsdiq edilən vergi hesab-fakturalarıdır.
Vergi hesab-fakturalarında mallar və xidmətlər rəsmi istifadə üçün alındıqda nümayəndəliyin məsul işçisinin, şəxsi istifadə üçün alındıqda isə işçilərin və ailə üzvlərinin akkreditə vəsiqəsinə əsasən doldurulmaqla, aşağıdakı məlumatlar əks etdirilməlidir:
- məsul işçinin və ya işçilərin adı, soyadı, vəzifəsi, işçisi olduğu nümayəndəliyin adı, akkreditə vəsiqəsinin nömrəsi və rəngi;
- ailə üzvlərinin adı, soyadı, ailəsinin üzvü olduğu işçinin nümayəndəliyinin adı, akkreditə vəsiqəsinin nömrəsi və rəngi.

III. Sənədlərin təqdimi

1. Nümayəndəliyin rəsmi istifadəsi, habelə, işçilərin və ailə üzvlərinin şəxsi istifadələri üçün alınan mallara və xidmətlərə görə ödənilmiş əlavə dəyər vergisinin qaytarılması üçün nümayəndəlik tərəfindən müvəkkil edilmiş şəxs tərəfindən imzalanmaqla, nümayəndəliyin yerləşdiyi ərazi üzrə vergi orqanına bu Qaydalara 1N-li Əlavə üzrə müvafiq ərizə ilə müraciət edilməlidir.
Vergilərin qaytarılması haqqında ərizələr hər rüb üzrə həmin rübdən sonrakı ayın 20-dək dörd nüsxədə təqdim edilir.
Vergilərin qaytarılması üçün mövcud qanunvericiliklə müəyyən edilmiş müddətə riayət edilməsi şərti ilə, əvvəlki dövrlər üzrə artıq ödənilmiş vergilərin məbləği müvafiq rüb üzrə qaytarılası ümumi məbləğə daxil edilə bilər.
Nüsxələrdən biri müvafiq qeyd edilməklə, nümayəndəliyə qaytarılır, ikincisi vergi orqanında saxlanılır, digər ikisi isə müvafiq rəylə birgə maliyyə orqanına göndərilir.
 Ərizəyə aşağıdakı sənədlər əlavə edilir:
- bu Qaydalara 2N-li Əlavə üzrə nümayəndəliyin işçilərinin və onların ailə üzvlərinin siyahısı (onların akkreditə vəsiqələri üzrə müvafiq məlumatlar da əlavə edilməklə);
- bu Qaydalara 3 və 4N-li Əlavələr üzrə ilkin sənədlərin reyestri;
- alınmış mallara və xidmətlərə görə vergilərin ödənilməsini təsdiq edən vergi hesab-fakturaları (bank ödəniş sənədləri, kassa çekləri, qəbzlər və ödənişi təsdiq edən digər sənədlər əlavə edilməklə) yaxud onların surətləri.
Bu Qaydalara 3N-li Əlavə üzrə reyestr nümayəndəliyin rəsmi istifadəsi üçün malların və xidmətlərin alınmasına məsul edilmiş işçi, 4N-li Əlavə üzrə reyestr isə işçilər və ya onların ailə üzvləri tərəfindən doldurulur.
2. Ərizələr və ona əlavə edilən digər sənədlər nümayəndəlik tərəfindən təyin edilən səlahiyyətli şəxs tərəfindən təqdim edilir.
3. Zəruri sayıldığı halda, vergi orqanının səlahiyyətli əməkdaşı nümayəndəliyin müvəkkil şəxsinə, habelə, malı və ya xidməti təqdim edən vergi ödəyicisinə sorğu verərək, müvafiq araşdırma apara bilər.
 Vergi orqanı aşağıdakı hallarda əlavə dəyər vergisi məbləğlərinin qaytarılması üçün əsasların olmadığı barədə sənədlərin daxil olduğu gündən sonra 15 gün müddətində nümayəndəliyə yazılı şəkildə məlumat verməlidir:
- sənədlər lazımi qaydada tərtib edilmədikdə;
- məlumatlar tam göstərilmədikdə;
- tam komplektdə təqdim edilmədikdə;
- təqdim edilmiş sənədlərin doğruluğu barədə şübhələr yarandıqda;
- vergilərin qaytarılması üçün mövcud qanunvericiliklə müəyyən edilmiş müddət bitdikdə.

IV. Tutulmuş vergilərin qaytarılması

 1. Vergi orqanı tərəfindən 15 gün ərzində təqdim edilmiş sənədlərə baxılır və ödənilmiş əlavə dəyər vergisinin qaytarılması barədə bu Qaydalara 5N-li Əlavəyə əsasən, 22N-li forma üzrə 4 nüsxədə müvafiq rəy hazırlanır.
Tərtib edilmiş rəylərin 2 nüsxəsi 2, 3 və 4N-li Əlavələrin surətləri ilə birgə artıq ödəmənin qaytarılmalı olduğu müvafiq maliyyə orqanına verilir.
Maliyyə orqanı zəruri hallarda təqdim edilmiş rəylərlə bağlı əlavə məlumatlar tələb edə bilər.
Tutulmuş vergilərin qaytarılması maliyyə orqanının tapşırığına əsasən, xəzinə orqanları tərəfindən nümayəndəliklərin Azərbaycan Respublikası ərazisində yerləşən müvəkkil banklarda açılmış hesablarına milli pul vahidi – Azərbaycan Manatı ilə nəğdsiz qaydada köçürülməsi yolu ilə həyata keçirilir.
Maliyyə orqanları tərəfindən müvafiq vergi orqanına artıq ödəmənin qaytarıldığı barədə 5 gün müddətində məlumat verilir.
2. Artıq ödəmələrin faktiki qaytarılmış məbəlğləri nümayəndəliklərin şəxsi hesab vərəqəsində əks etdirilir və Dövlət büdcəsinin mədaxili büdcəyə artıq ödəmələrin faktiki qaytarılmış məbləği qədər azaldılır.
Müəyyən məbləğlərin səhvən qaytarıldığı bütün hallarda vergilərin tutulması üçün müəyyən edilmiş qaydada vergi orqanlarının tələbinə əsasən, həmin məbləğlər geri qaytarılmalıdır.

V. Artıq ödənilmiş vergilərin qaytarılma müddəti

Artıq ödəmələr 45 gün ərzində vergi ödəyicisinə qaytarılmalıdır.
Bu müddət vergi ödəyicisinin bu barədə ərizə verdiyi gündən vəsaitin müvafiq dövlət xəzinədarlığının hesabından çıxdığı günədək olan dövrü əhatə edir.

VI. Vergi və maliyyə orqanlarının məsuliyyəti

1. Vergi ödəyicisi tərəfindən büdcəyə artıq ödəmələrin qaytarılması barədə vergi orqanına ərizə verildiyi tarixdən həmin məbləğlər geri qaytarılanadək gecikdirilən hər gün üçün (ödəmə günü də daxil olmaqla) vergi ödəyicisinə müvafiq məbləğin 0,05 faizi məbləğində faiz ödənilir. Bu faizlərin ödənilməsi büdcə gəlirlərinin azaldılmasına aid edilir.
Vergi ödəyicisinin artıq ödənilmiş məbləğlərin qaytarılmasına dair vergi orqanına ərizə verildiyi tarixdən 45 gün ərzində məbləğ qaytarılırsa, vergi ödəyicisinə faiz ödənilmir.
Büdcəyə artıq ödəmələrin qaytarılmasının gecikdirilməsi vergi ödəyicisinin mövcud qaydalara riayət etməməsi səbəbindən baş verdiyi halda, gecikdirilmiş müddət üçün faiz ödənilmir.
2. Bu Qaydalara riayət edilməməsinə görə təqsirkar olan şəxslər mövcud qanunvericilikdə nəzərdə tutulmuş qaydada məsuliyyət daşıyırlar.       
 
 

Əlavə 1

Əlavə 2

Əlavə 3

  Əlavə 4

Əlavə 5

Forma 22 V

Azərbaycan Respublikası Maliyyə Nazirliyinin 26 mart 2001-ci il tarixli I-34 saylı Əmri ilə təsdiq edilmişdir

Xarici diplomatik və analoji nümayəndəliklərin rəsmi istifadəsi, həmçinin bu nümayəndəlik-lərin diplomatik, inzibati və texniki işçilərinin, o cümlədən onlarla yaşayan ailə üzvlərinin şəxsi istifadəsi üçün nəzərdə tutulan mallara və xidmətlərə görə əlavə dəyər vergisinin qaytarılması barədə

R Ə Y

1.1 Vergilərin büdcəyə daxil olmasını təmin edən orqanın adı 
1.1.1 VÖEN-i 
2.1 Xarici diplomatik və analoji nümayəndəliyin və ya müvafiq işçilərin adı 
2.1.1 VÖEN-i 
2.1.2 Akkreditə edən dövlət və ya beynəlxalq təşkilatın adı 

Təqdim olunmuş materiallardan görünür ki, xarici diplomatik və analoji nümayəndəlik-lərin rəsmi istifadəsi, həmçinin bu nümayəndəliklərin diplomatik, inzibati və texniki işçilərinin, o cümlədən onlarla yaşayan ailə üzvlərinin şəxsi istifadəsi üçün nəzərdə tutulan malların və xidmətlərin «0» (sıfır) dərəcə ilə əlavə dəyər vergisinə cəlb olunması nəticəsində «____» __________ 200 ___ -ci il tarixinə əlavə dəyər vergisi üzrə aşağıdakı artıq ödəmə yaranmışdır:

 Yaranmış artıq ödəmə
_______________________________________________________________
                     (bankın adı, VÖEN-i
______________________________ hesaba qaytarılmalıdır
                          hesab nömrəsi)

Vergilərin büdcəyə daxil olmasını
təmin edən orqanın rəhbəri              _________      ____________    _____________________
                                                          (imza)               (möhür)                   (adı və soyadı)

Bildirişin tarixi «____» ______________  200 __ -ci il

Bildirişin N______