Azәrbaycan Respublikasının Nazirlәr Kabineti

Vergi ödәyicisinin siyahıya alınmış әmlakının açıq hәrraclarda satılması Qaydalarının tәsdiq
edilmәsi haqqında

Qәrar N 170

Bakı şәhәri, 26 oktyabr 2001-ci il

«Azәrbaycan Respublikası Vergi Mәcәllәsinin tәsdiq edilmәsi, qüvvәyә minmәsi vә bununla bağlı hüquqi tәnzimlәmә mәsәlәlәri haqqında» Azәrbaycan Respublikasının Qanununun vә bu Qanunla tәsdiq edilmiş Azәrbaycan Respublikası Vergi Mәcәllәsinin tәtbiq edilmәsi barәdә» Azәrbaycan Respublikası Prezidentinin 2000-ci il 30 avqust tarixli 393 nömrәli Fәrmanının icrasını tәmin etmәk mәqsәdi ilә Azәrbaycan Respublikasının Nazirlәr Kabineti qәrara alır:

1. «Vergi ödәyicisinin siyahıya alınmış әmlakının açıq hәrraclarda satılması Qaydaları» tәsdiq edilsin (әlavә olunur).

2. Müәyyәn edilsin ki:

vergi ödәyicisinin siyahıya alınmış әmlakının satışı ixtisaslaşdırılmış hәrraclar tәşkil olunana qәdәr Azәrbaycan Respublikasının İqtisadi İnkişaf Nazirliyinin nәzdindә fәaliyyәt göstәrәn Respublika Auksion Mәrkәzi tәrәfindәn hәyata keçirilir; siyahıya alınmış dövlәt әmlakının satışı ixtisaslaşdırılmış açıq hәrraclarda Azәrbaycan Respublikasının İqtisadi İnkişaf Nazirliyinin nәzdindә fәaliyyәt göstәrәn Respublika Auksion Mәrkәzi tәrәfindәn hәyata keçirilir.

3. Bu qәrar imzalandığı gündәn qüvvәyә minir.

Azәrbaycan Respublikasının Baş naziri

A. RASİ-ZADƏ

Azәrbaycan Respublikası Nazirlәr Kabinetinin 2001-ci il 26 oktyabr tarixli 170 nömrәli qәrarı ilә tәsdiq edilmişdir

Vergi ödәyicisinin siyahıya alınmış әmlakının açıq hәrraclarda satılması
Qaydaları

I. Ümumi müddәalar

1.1. Bu Qaydalar Azәrbaycan Respublikası Vergi Mәcәllәsinin 90.3-cü maddәsinә vә qüvvәdә olan digәr qanunvericilik aktlarına uyğun olaraq hazırlanmışdır.

1.2. Bu Qaydalar vergi ödәyicisinin siyahıya alınmış әmlakının (bundan sonra — әmlak) açıq hәrraclarda satışı qaydalarını, alıcıların iştirakı vә hesablaşma şәrtlәrini müәyyәn edir.

1.3. Əmlakın açıq hәrracda satışı — mәhkәmәnin qanuni qüvvәyә minmiş qәrarı әsasında hәmin әmlaka dair heç hir şәrt qoyulmadan satışıdır. Bu zaman әn yüksәk qiymәt tәklif etmiş alıcı hәmin әmlak üzәrindә mülkiyyәt hüququnu qazanır.

1.4. Hәrracın tәşkilatçısı qismindә ixtisaslaşdırılmış tәşkilat, әmlakın satıcısı kimi isә mәhkәmә icraçıları çıxış edirlәr.

II. Hәrracın keçirilmәsinә hazırlıq

2.1. Hәrracın keçirilmәsi üçün hәrracın tәşkilatçısına aşağıdakı sәnәdlәr tәqdim edilmәlidir:

vergi ödәyicisinin әmlakının hәrracda satışı barәdә mәhkәmәnin qanuni qüvvәyә minmiş qәrarı;
icraata başlanılması barәdә mәhkәmә qәrarına әsasәn verilәn icra sәnәdi;
әmlakın ilkin satış qiymәti barәdә mәlumat; әmlakın satışından әldә olunan vәsaitin köçürülәcәyi bank hesabının nömrәsi.

2.2. Hәrracın tәşkilatçısı bu Qaydaların 2.1-ci bәndindә göstәrilәn sәnәdlәri aldıqdan sonra hәrracın keçirilmәsi gününә әn azı 30 (otuz) gün qalmış kütlәvi informasiya vasitәlәrindә hәrraca çıxarılacaq әmlak barәsindә elan dәrc etdirir.

2.3. Elanda aşağıdakı mәlumatlar әks olunmalıdır:

hәr bir lot üzrә ayrı-ayrılıqda satışa çıxarılan әmlakın siyahısı, yerlәşdiyi ünvan;
siyahı üzrә әmlakın ayrı-ayrılıqda ilkin satış qiymәti;
hәrracda iştirak etmәk üçün sifariş vә digәr sәnәdlәrin qәbulu günü, son müddәti vә yeri;
әmlakın sahibi barәdә mәlumat;
ilkin satış qiymәtinin 10 faizi hәcmindә hesablanan behin mәblәği vә hәmin mәblәğin keçirilәcәyi bank hesabı;
әmlakın satışından әldә olunan vәsaitin köçürülәcәyi hesablar vә bu hesablara köçürülәcәk vәsaitin miqdarı;
hәrracın keçirilmә tarixi, vaxtı vә yeri, әlaqә telefonunun nömrәsi;
hәrracın tәşkilatçısının ünvanı, telefonu vә sair rekvizitlәri.

2.4. Mәlumatın dәrc olunduğu andan qanunvericiliklә hәrracda iştirak etmәk hüququ qazanmış fiziki vә hüquqi şәxslәrә satışa çıxarılan әmlakla tanış olmaq imkanı yaradılır.

Satışa çıxarılan әmlakla tanış olduqdan sonra hәrracın keçirilmәsinә 5 (beş) gün qalmış hәrraca buraxılmış fiziki vә hüquqi şәxslәr hәrracın tәşkilatçısına hәrracda iştirak edib-etmәyәcәklәri barәdә öz qәti qәrarlarını yazılı surәtdә bildirmәlidir.

III. Hәrracda iştirak qaydaları

3.1. Sifariş vermiş vә müvafiq qaydada sәnәdlәri tәrtib edib, elanda göstәrilәn müddәtdә tәqdim etmiş, habelә elanda göstәrilәn hesablaşma hesabına behin köçürülmәsi barәdә bildiriş tәqdim etmiş istәnilәn fiziki vә hüquqi şәxslәr hәrracda iştirak edә bilәrlәr.

3.2. Hәrracda iştirak etmәk üçün fiziki vә ya hüquqi şәxs vә ya onların sәlahiyyәtli nümayәndәlәri tәrәfindәn imzalanmış (hüquqi şәxs tәrәfindәn әlavә olaraq möhürlә tәsdiq edilmiş) sifariş (әrizә) satıcı tәrәfindәn müәyyәn olunmuş nümunәyә müvafiq olaraq hәrracın
tәşkilatçısına verilir vә sifarişә aşağıdakı sәnәdlәr әlavә edilir:

elanda göstәrilmiş hesaba behin köçürülmәsini tәsdiq edәn sәnәd;
fiziki şәxslәr tәrәfindәn şәxsiyyәti tәsdiq edәn sәnәd;
hüquqi şәxslәr tәrәfindәn tәsis sәnәdlәrinin surәtlәri vә vergi ödәyicisinin eynilәşdirmә nömrәsi.

3.3. Hәrracın tәşkilatçısı tәrәfindәn aşağıdakı hallar müәyyәn edildikdә, fiziki vә hüquqi şәxslәr hәrracda iştirak etmәk üçün buraxılmırlar:

yenidәn tәşkil olunma, lәğv olunma yaxud müflis vәziyyәtindә olan hüquqi şәxslәr;
özü haqqında dәqiq olmayan mәlumat verәn fiziki vә hüquqi şәxslәr; sifarişlәrin qәbulu müddәti qurtardıqdan sonra sәnәdlәr tәqdim edildikdә;
sifariş sifarişçinin adından sәlahiyyәti olmayan şәxs tәrәfindәn tәqdim edildikdә;
mәlumatda göstәrilәn siyahıya uyğun bütün sәnәdlәr tәqdim edilmәdikdә, yaxud tәqdim olunmuş sәnәdlәr müvafiq qaydada tәrtib olunmadıqda.

3.4. Sәnәdlәrin qәbulundan imtina hәrracın tәşkilatçısı tәrәfindәn әsasları göstәrilmәklә edilir. Sifarişi vә sәnәdlәri qәbul edilmәyәn fiziki vә hüquqi şәxslәrә sәnәdlәr, onların qәbulu günü әrzindә, әsasları yazılı surәtdә göstәrilmәklә geri qaytarılır.

3.5. Hәrracda iştirak etmәk üçün fiziki vә hüquqi şәxslәr sifarişi vә ona әlavә olunmuş sәnәdlәri, habelә tәqdim olunan sәnәdlәrin 2 nüsxәdәn ibarәt siyahısını hәrracın tәşkilatçısına tәqdim edirlәr.

Hәrracın tәşkilatçısı hәr bir sifarişi vә ona әlavә olunmuş sәnәdlәri verilmә tarixi vә vaxtını göstәrmәklә xüsusi curnalda ardıcıllıqla qeyd edir.

Hәrracın tәşkilatçısı tәqdim olunan sәnәdlәrin siyahısının bir nüsxәsindә sifarişin verilmә tarixini vә vaxtını, habelә qeydiyyat curnalındakı nömrәsini göstәrmәklә sifarişçinin özünә qaytarır.

3.6. Hәrrac iştirakçılarına onların hәrracda iştirak etmәk nömrәsini әks etdirәn bilet verilir.

3.7. Fiziki vә ya hüquqi şәxslәr sifarişlәrin qәbulu başa çatanadәk öz sifarişini geri götürә bilәr. Bu mәqsәdlә sifarişçi yazılı surәtdә hәrracın tәşkilatçısına müraciәt etmәlidir.

Sifarişin geri götürülmәsi sәnәdlәrin qәbulu curnalında müvafiq surәtdә öz әksini tapmalıdır.

Hәrracın şәrtlәrinә uyğun olaraq sifarişini geri götürmüş fiziki vә ya hüquqi şәxslәrin ödәdiyi beh geri qaytarılır.

3.8. Sifarişçilәrin hәrraca buraxılıb-buraxılmaması barәdә hәrracın tәşkilatçısının qәrarı protokolla rәsmilәşdirilir. Bu protokolda sifarişlәri qәbul edilәn vә rәdd edilәn fiziki vә hüquqi şәxslәrin adları qeyd edilir. Sifarişlәri rәdd edilәn fiziki vә hüquqi şәxslәrә bu barәdә әsasları göstәrilmәklә yazılı surәtdә bildirilir.

Sifarişçi hәrracın iştirakçısı statusunu sifarişlәrin qәbuluna dair protokol imzalandıqdan sonra qazanır.

3.9. Hәrracın tәşkilatçısı tәqdim olunmuş sifarişlәrin vә ona әlavә olunmuş sәnәdlәrin müvafiq qaydada saxlanılması üçün zәruri tәdbirlәr görür.

IV. Hәrracın keçirilmәsi qaydası

4.1. İcraata başlanması barәdә mәhkәmә qәrarına әsasәn verilәn icra sәnәdi icraya tәqdim edildiyi tarixdәn 10 (on) gün müddәtindә hәrracı tәşkil etmәk üçün satıcı tәrәfindәn hәrrac komissiyası (bundan sonra — komissiya) yaradılır vә komissiyanın iş reqlamenti tәsdiq olunur.

4.2. Satıcının qәrarı ilә komissiyanın tәrkibi 5 (beş) nәfәrdәn ibarәt müәyyәn edilir. Komissiyanın tәrkibinә 1 nәfәr satıcının nümayәndәsi vә hәr birindәn 1 nәfәr olmaqla Azәrbaycan Respublikası Ədliyyә Nazirliyinin, İqtisadi İnkişaf Nazirliyinin, Maliyyә Nazirliyinin vә hәrracın tәşkilatçısının nümayәndәlәri daxil edilir.

Komissiyanın sәdri satıcının nümayәndәsi tәyin olunur. Komissiyanın qәrarları sadә sәs çoxluğu ilә qәbul edilir. Komissiya üzvlәrinin on azı üçdә iki hissәsi iştirak etdikdә onun qәrarları sәlahiyyәtli hesab olunur.

Komissiyanın hәr bir üzvü bir sәsә malikdir. Sәslәr bәrabәr olduqda, komissiya sәdrinin sәsi hәlledici hesab olunur.

4.3. Komissiya:

hәrracın tәşkil olunmasını vә keçirilmәsini tәmin edir;
satışın baş tutub-tutmadığını tәsdiq edir;
hәrracın gedişindә mübahisәli vәziyyәt yarandıqda satışı dayandırır;
hәrracın yekunu barәdә protokol tәrtib edir vә onu tәsdiq üçün satıcıya tәqdim edir.

4.4. Hәrrac aşağıdakı qaydada keçirilir:

satışa çıxarılan әmlakın ilkin satış qiymәti elan olunur. İlkin satış qiymәti vә ya әlavәlәr edilmәklә artırılan satış qiymәti elan olunduqda, sifarişçilәr öz biletlәrini qaldırmaqla elan olunmuş qiymәtә әmlakı almağa razı olduqlarını bildirirlәr;
hәrracı aparan hәr yeni elan olunmuş qiymәti üç dәfә tәkrar edir. Elan olunmuş satış qiymәtinә әmlakı almağa razı olan sifarişçilәrin sayı iki vә daha çox olduqda hәmin qiymәt sifarişçilәr tәrәfindәn әlavәetmә yolu ilә artırılır. Elan olunmuş satış qiymәtinә әmlakı almağa yalnız bir sifarişçi razılıq verdiyi halda hәmin şәxs hәrracın qalibi hesab olunur. Bu vaxt hәrracı aparan şәxs әmlakın satıldığını, satış qiymәtini vә qalib gәlmiş şәxsin biletinin nömrәsini bildirir;
ilkin qiymәt vә ya әmlakın növbәti hәrracda aşağı salınmış qiymәti 3 (üç) dәfә elan olunduqdan sonra iştirakçıların heç biri biletini qaldırmazsa, hәrrac baş tutmamış hesab olunur;
birinci hәrrac baş tutmadıqda vә ya siyahı üzrә ayrı-ayrılıqda әmlakın satışı baş tutmadıqda, hәr növbәti hәrraca 10 (on) gün qalmış kütlәvi informasiya vasitәlәrindә 2. 3-cü bәnddә qeyd olunan elan dәrc olunur. İkinci hәrracda qiymәt birinci hәrracda satılmayan әmlakın vә ya onun ayrılıqda siyahı üzrә satılmayan hissәsinin ilkin satış qiymәtinin 10 faizi hәcmindә, üçüncü vә dördüncü hәrraclarda isә müvafiq olaraq ilkin satış qiymәtinin 20 vә 40 faizi hәcmindәn çox olmamaq şәrti ilә aşağı salına bilәr;
bu zaman hәrraclararası müddәt 45 (qırx beş) gündәn az olmamalıdır;
hәrrac başa çatdıqdan sonra komissiya hәrracın yekunlarını protokollaşdırır. Protokol 2 (iki) nüsxәdә qalib gәlmiş şәxs vә ya onun nümayәndәsi, komissiyanın sәdri vә üzvlәri tәrәfindәn imzalanır. Bu protokol müqavilә qüvvәsinә malikdir. Protokolda satıcı vә qalib gәlmiş şәxs barәdә qısa mәlumatlar, satılan әmlakın siyahısı vә satış qiymәti, satış qiymәtinin ödәnilәcәyi hesablar, hәrracda qalib gәlmiş şәxsin verdiyi beh mәblәğinin imzalanmış protokol üzrә öhdәliklәrin icrası hesabına daxil edilmәsi, habelә tәrәflәrin digәr hüquq vә vәzifәlәri әks olunur. Protokolun bir nüsxәsi qalib gәlmiş şәxsә verilir. Hәrracın qalibi vә komissiya hәrrac başa çatdığı gün protokolu imzalamalıdır. İmzalanmış protokol üç gündәn gec olmayaraq satıcıya tәqdim olunmalıdır.

Qalib gәlmiş şәxs protokolu imzalamaqdan boyun qaçırarsa, verdiyi beh geri qaytarılmır. Protokolu imzalamaqdan boyun qaçıran satıcı qalib gәlmiş şәxsә behi ikiqat mәblәğdә geri qaytarmalı, habelә hәrracda iştirak etmәk nәticәsindә dәyәn zәrәrin әvәzini ödәmәlidir. Ziyanın mәblәği satıcının vә qalib gәlmiş şәxsin razılığı әsasında müәyyәn edilir. Tәrәflәr razılığa gәlmәdikdә, zәrәrin mәblәği onların birinin әrizәsi әsasında mәhkәmә qaydasında müәyyәn edilir. Hәrrac baş tutmadıqda beh geri qaytarılmalıdır. Hәrracda iştirak edәn, lakin onu udmayan şәxslәrin behi 5 (beş) bank günü müddәtindә qaytarılır.

Hәrrac baş tutmadığı hallarda onun yekunu komissiya tәrәfindәn protokollaşdırılır.

4.5. Hәrracın yekunları haqqında mәlumat hәrracın keçirildiyi gündәn on beş tәqvim günü müddәtindә hәrracın tәşkilatçısı tәrәfindәn mәtbuatda dәrc olunur.

4.6. Hәrracın qalibi ilә satıcı arasında protokol imzalandığı andan әn geci beş bank günü müddәtindә hәrracın qalibi ödәnilmәli olan pul vәsaitini satıcının müәyyәn etdiyi bank hesabına köçürür. Hәrracın tәşkilatçısı hәrracın keçirilmәsi ilә bağlı çәkdiyi xәrclәri tәsdiq edәn sәnәdlәri satıcıya tәqdim edir.

4.7. Əmlakın (vә ya müәyyәn lotun) qiymәtinin tam ödәnilmәsini tәsdiq edәn ödәniş sәnәdi(lәri) tәqdim edildikdәn sonra әmlaka (lota) mülkiyyәt hüququ hәrracın qalibinә keçir.

V. Hәrracın nәticәlәrinin etibarsız hesab edilmәsi

5.1. Qanunvericiliyin müddәalarını pozmaqla keçirilәn hәrrac maraqlı şәxslәrin iddiası üzrә mәhkәmә tәrәfindәn etibarsız hesab edilә bilәr.

5.2. Hәrracın etibarsız sayılması hәrracı udmuş şәxslә bağlanan müqavilәnin etibarsızlığına sәbәb olur.

VI. Yekun müddәa

Siyahıya alınmış әmlakın açıq hәrracda satışında vergi, әdliyyә vә maliyyә orqanlarının vә Azәrbaycan Respublikası İqtisadi İnkişaf Nazirliyinin vә mәhkәmә icraçılarının vәzifәli şәxslәrinin bilavasitә vә ya dolayısı ilә alıcı kimi iştirak etmәsinә yol verilmir.